Në Gjykatën Themelore të Prishtinës ka vazhduar gjykimi ndaj Jelena Gjukanoviqit, e cila po akuzohet për spiunazh nga Prokuroria Speciale. Para trupit gjykues, Gjukanoviq nuk e ka pranuar fajësinë për akuzat që i ngarkohen. “Nuk e pranoj fajësinë”, ka deklaruar ajo.
Ndërkohë, prokurori Bekim Kodraliu ka prezantuar aktakuzën e ngritur ndaj saj. Sipas tij, nga një datë e pacaktuar e deri në momentin e arrestimit më 28 shkurt 2025, Gjukanoviq në cilësinë e zyrtares vendore të Misionit të OSBE-së në Kosovë, pranë Zyrës Rajonale në Mitrovicë, ka kryer veprime të përsëritura që përbëjnë ndihmë aktive për veprimtarinë informative të Agjencisë për Inteligjencë dhe Siguri të Republikës së Serbisë (BIA).
Prokuroria pretendon se ajo ka ofruar të dhëna, dokumente dhe informacione të ndjeshme, të siguruara gjatë ushtrimit të detyrës së saj në OSBE, përmes komunikimeve të shumta me Aleksandër Vllaiqin, agjent rezident i BIA-s i dënuar tashmë për spiunazh. Këto informacione, sipas akuzës, janë përcjellë më pas tek zyrtarë të lartë të BIA-s, përfshirë përgjegjësin për Rajonin e Novi Pazarit dhe një tjetër zyrtar me të cilin Gjukanoviq dyshohet se është takuar disa herë në Beograd.
Gjithashtu, akuzohet se përmes pozitës së saj në OSBE dhe udhëzimeve të marra nga Vllaiq e zyrtarët e BIA-s, ka ndikuar në raportet e OSBE-së për situatën politike dhe të sigurisë në Kosovë, duke kontribuar në krijimin e një narrative armiqësore ndaj institucioneve të vendit. Sipas Prokurorisë, me këto veprime të qëllimshme, ajo ka cenuar rëndë rendin kushtetues dhe sigurinë kombëtare, si dhe ka vënë në rrezik serioz jetën dhe sigurinë e zyrtarëve shtetërorë, qytetarëve dhe personelit ndërkombëtar të Misionit të OSBE-së në Kosovë.
