Një ngjarje e rëndë ka ndodhur në SHBA, ku aktivisti politik dhe komentatori konservator, mbështetës i presidentit Donald Trump, Charlie Kirk, u bë shënjestër e një sulmi me armë gjatë një aktiviteti në Universitetin e Utah Valley, përcjell KosovaNews
Sipas NBC News, Kirk është dërguar me urgjencë në spital, por ende nuk dihet gjendja e tij shëndetësore.
Presidenti Trump reagoi menjëherë përmes rrjetit të tij social Truth Social, duke u bërë thirrje qytetarëve që të luten për Kirk.
Policia e universitetit konfirmoi se është qëlluar me armë dhe u kërkoi njerëzve të gjenin strehim të sigurt.
Si ndodhi sulmi?
Një dëshmitar i ngjarjes, Justin Hickens, i cili gjendej rreth 20 metra larg vendit të incidentit, tha për NBC News se pa momentin kur Kirk u godit.
“Dëgjuam një të shtënë të fortë arme, pashë shumë gjak që po i rridhte nga trupi, ai u rrëzua menjëherë dhe të gjithë njerëzit u shtrinë në tokë”, rrëfeu ai.
Pas pak sekondash, turma filloi të largohej duke rrëzuar barrikadat. Hickens shtoi se më pas pa policët teksa arrestuan një burrë të moshuar me flokë të bardha, i cili bërtiste teksa i vendosnin prangat.
Ai gjithashtu vuri në dukje se në hyrje të sallës nuk kishte detektorë metalikë, por Kirk kishte marrë masa sigurie për aktivitetin.
Kush është Charlie Kirk?
Charlie Kirk, 31 vjeç, është një aktivist konservator dhe baba i dy fëmijëve. Ai është i njohur si bashkëthemelues i organizatës studentore Turning Point USA, e cila mobilizon të rinjtë konservatorë në kampuset universitare amerikane.
Ai është një nga mbështetësit më të afërt të presidentit Donald Trump, i cili e ka përmendur shpesh me fjalë pozitive në fushatat e tij elektorale. Vetëm pak ditë pas tentativës për atentat ndaj Trump, Kirk mbajti një fjalim në kongresin presidencial të vitit 2024.
Në disa tubime të zhvilluara muajve të fundit, Trump e ka cilësuar Kirk si “të jashtëzakonshëm”, “një talent të veçantë” dhe “një udhëheqës me vizion”.
