Kosova ka pranuar fluturaket pa pilot AeroVironment RQ-20 Puma, të prokuruara nga Shtetet e Bashkuara të Amerikës, ka bërë të ditur ministri në detyrë i Mbrojtjes, Ejup Maqedonci.
Sipas tij, prokurimi i këtyre dronëve është realizuar përmes programit shtet më shtet, të njohur si Foreign Military Sale (FMS), ndërsa pagesa për këtë sistem është kryer që në vitin 2021.
“Fluturaket Puma, krahas fluturakeve tjera, janë një kapacitet tjetër i nevojshëm për rritjen e aftësive të FSK-së në fushën e sistemeve ajrore pa pilot”, ka theksuar Maqedonci.
Ai ka shtuar se bashkëpunimi me ShBA-në në fushën e mbrojtjes po thellohet dhe zgjerohet vazhdimisht, duke kontribuar në zhvillimin e ushtrisë së Kosovës dhe në arritjen e interesave të përbashkëta të dy vendeve.
