Dy persona të armatosur palestinezë kanë hapur zjarr në drejtim të një stacioni autobusësh në periferi të Jerusalemit të hënën (08.09.2025), duke vrarë gjashtë persona në atë që policia e përshkroi si “sulm terrorist”, një nga më vdekjeprurësit viteve të fundit në qytet, raporton Reuters.
Pamjet nga kamerat në vendin e ngjarjes kanë treguar njerëz që iknin përreth një autobusi të ndalur anësh një rruge, ndërsa po dëgjoheshin të shtëna. Një video tjetër tregoi xhamin e përparmë dhe dritaret e një autobusi të shpuara me vrima plumbash.
“Papritmas dëgjova të shtënat që filluan… Ndjeva sikur po vrapoja përjetësisht”, ka thënë për televizionin izraelit nga spitali Ester Lugasi, e cila u plagos në sulm. “Mendova se do të vdisja”.
Shërbimi i ambulancës ka identifikuar pesë viktimat si një burrë 50-vjeçar, një grua në të pesëdhjetat dhe tre burra në të tridhjetat. Raportohet se 11 persona të tjerë kanë pësuar lëndime, përfshirë gjashtë në gjendje të rëndë me plagë nga armë zjarri.
Ministri i Jashtëm izraelit, Gideon Saar, ka deklaruar se një person i gjashtë ka vdekur dhe se personat e armatosur ishin palestinezë nga Bregu Perëndimor i pushtuar nga Izraeli.
Grupi militant palestinez ‘”Hamas” ka bërë të ditur se dy “luftëtarë të rezistencës” palestineze kishin kryer sulmin, por nuk mori përgjegjësinë. “Xhihadi Islamik”, një tjetër grup militant palestinez, nuk e ka marrë përgjegjësinë.
Duke folur në vendin e sulmit, kryeministri Benjamin Netanyahu tha se forcat izraelite po ndiqnin të dyshuarit që i ndihmuan ata.
Policia izraelite tha se dy sulmues mbërritën me makinë dhe hapën zjarr në një stacion autobusi në kryqëzimin Ramot. Disa armë, municione dhe një thikë e përdorur nga sulmuesit u gjetën në vendngjarje, ka njoftuar policia.
Ushtria izraelite ka deklaruar se ka vendosur ushtarë në zonë të cilët po ndihmonin policinë në kërkimin e të dyshuarve. Ushtarët gjithashtu po vepronin në zonat e Ramallahut në Bregun Perëndimor për të kryer marrje në pyetje dhe për të “penguar terrorizmin”, tha ajo/ kallxo.com
