Presidentja e Komisionit Evropian, Ursula von der Leyen, vizitoi Estoninë si pjesë e një turi katërditor në shtetet kufitare, me synim theksimin e solidaritetit me këto vende dhe mbështetjen e zhvillimit të industrisë evropiane të mbrojtjes.
Duke folur në Estoni në një konferencë të përbashkët për media të shtunën me kryeministrin estonez, Kristen Michal, Von der Leyen theksoi se sanksionet ndaj Rusisë duhet të ashpërsohen dhe se Evropa ka nevojë të rrisë shpenzimet për mbrojtjen.
“Qëllimi ynë është që deri në vitin 2030 të kemi plotësuar ndjeshëm të gjitha boshllëqet që kemi identifikuar sot,” tha Von der Leyen nga baza ajrore Ämari, ku janë të stacionuara avionët e NATO-s. “Këtu i kushtojmë një fokus të fortë mbrojtjes”.
“Estonia po e bën krahun lindor më të sigurt. Dhe Evropën, më të fortë”, shtoi ajo.
Me ndihmën e instrumentit të huasë Security Action for Europe (SAFE) të Komisionit Evropian, Estonia planifikon të marrë hua 3.6 miliardë euro për të financuar shpenzimet e saj të mbrojtjes.
“Estonia është tashmë ndër shpenzuesit kryesorë të mbrojtjes në NATO në raport me PBB-në,” tha presidentja e Komisionit Evropian në një deklaratë. “Pra, ne po investojmë shpejt më shumë, po investojmë më mirë dhe po investojmë si evropianë”.
