Përktheu: Alban Begolli
Studiuesit në Universitetin Monash të Australisë kanë zhvilluar syrin e parë bionik plotësisht funksional në botë, që konsiderohet si pajisje revolucionare e krijuar për t’u kthyer shikimin personave që janë plotësisht të verbër.
Pajisja, e quajtur Gennaris Bionic Vision System, anashkalon nervat optikë të dëmtuar duke përdorur një kamerë të vendosur në një headset, e cila transmeton sinjale drejtpërdrejt në tru përmes mikro-implanteve në korteksin vizual, transmeton KosovaNews.
Kjo teknologji e bën të mundur që personat që kanë humbur shikimin për shkak të dëmtimit të nervave apo lëndimeve ( jo vetëm nga sëmundjet e retinës) të rikthejnë një nivel shikimi.
Rezultatet e para treguan se pjesëmarrësit arritën të identifikojnë forma, modele dhe të lundrojnë mes pengesave, duke përmirësuar ndjeshëm pavarësinë dhe cilësinë e jetës.
Edhe pse sistemi ende nuk kthen shikimin natyral, ai përfaqëson një hap gjigant përpara në trajtimin e verbërisë.
Me provat klinike që pritet të fillojnë në Melburn, kjo risi mund ta bëjë një ditë verbërinë një gjendje të trajtueshme në mbarë botën, duke u dhënë miliona njerëzve mundësinë të shohin sërish. /KosovaNews/
