Me përfundimin e procedurave të prokurimit, Ministria e Mjedisit, Planifikimit Hapësinor dhe Infrastrukturës ka nisur implementimin e një projekti të rëndësishëm për rritjen e sigurisë në autoudhën R7 “Ibrahim Rugova”, veçanërisht në segmentet Morinë – Gjurgicë dhe Fushë Kosovë – Besi, duke përfshirë edhe nyjet përcjellëse të saj.
Ministri Liburn Aliu ka bërë të ditur se punimet, me vlerë rreth 1.9 milion euro, përfshijnë vendosjen e sinjalistikës horizontale, vertikale dhe pajisjeve të tjera rrugore që ndihmojnë në përmirësimin e qarkullimit dhe mbrojtjen e jetës së qytetarëve.
“Standardi i sigurisë matet në detaje, e rrugë më të sigurta nisin me sinjalizim të mirëfilltë. Nga kërkesa në zbatim, projekti po merr formë me hapa konkret,” u shpreh ministri Aliu.
Ky projekt vjen si pjesë e angazhimit të Qeverisë për të rritur sigurinë rrugore dhe për të ofruar kushte më të mira për të gjithë pjesëmarrësit në komunikacion. Punimet pritet të realizohen në përputhje me standardet më të larta evropiane dhe të përfundojnë brenda afateve të përcaktuara në kontratë.
