Lidhja Demokratike e Kosovë sonte ka prezantuar Arbër Ismajlin si kandidat për të parin e Gjilanit.
Prezent në këtë ngjarje ka qenë edhe kreu i LDK-së, Lumir Abdixhiku.
Abdixhiku para sipatizantëve dhe qytetarëve të LDK-së është shprehur se me Arbërin Gjilani do të ketë një kryetar që shërben jo që sundon.
Postimi i plotë:
Sonte, në Gjilan, në lagjen Dardania, mes shumë qytetarëve me interes plot, prezantuam kandidatin tonë për zgjedhjet lokale, Arbër Ismajlin.
Arbëri është biri i këtij qyteti. Është rritur në rrugët e këtij vendi. I njeh hallet e secilës lagje, e ndjen shpirtin e secilit @fshat, e njeh ndjeshmërinë e këtij populli. Nuk është prodhim zyre. Nuk është emër i importuar nga rrjetet sociale. Është i yni. Është i juaji. Është i Gjilanit.
Ai nuk vjen me fjalë të mëdha, por me plane konkrete. Nuk vjen me moralizime, por me angazhime. Nuk vjen për t’ju treguar juve se çfarë të mendoni – por për të dëgjuar, bashkëpunuar dhe zgjidhur problemet që ju i ballafaqoni.
Me Arbërin, Gjilani do të ketë një kryetar që shërben – jo që sundon. Një kryetar që respekton – jo që përçmon. Një kryetar që ndërton – jo që arsyeton.
Kjo është filozofia jonë. Qyteti nuk është pronë e askujt. Është besim i përbashkët. Është përgjegjësi e përditshme. Dhe ky besim nuk falet. Meritohet.
Më 12 tetor, Gjilani ka një mundësi të artë për ta ndalur rënien. Për ta ndalur arrogancën. Për ta ndalur improvizimin. Ka mundësinë ta zgjedhë punën përpara fjalës. Zgjuarsinë përpara propagandës. Thjeshtësinë përpara mendjemadhësisë.
Dhe këtë mundësi e ka në duar. E ka në zemër. E ka në votë. E ka me Arbër R. Ismajli!
