Deputetja Statovci godet opozitën: “U bashkuan sërish si një tabor i vetëm politik”

Deputetja e Lëvizjes Vetëvendosje, Jeta Statovci, ka reaguar për me mos konstituimin e Kuvendit as në përpjekjen e fundit të mbrëmshëm, duke e akuzuar opozitën se janë bashkuar për të penguar dhe bllokuar procese politike në vend.

Përmes një postimi në Facebook, Statovci ka thënë se opozita po vepron si një trup i vetëm politik, me “bindje të njëjta, mjete të njëjta dhe interesa të përbashkëta”.

“Ata – ashtu siç e kemi ditur gjithmonë – u rishfaqën sërish si një tabor i vetëm politik: me bindje të njëjta, mjete të njëjta, interesa të përbashkëta. E kaluara e tyre është më e gjallë se kurrë”, ka shkruar ajo.

Sipas saj, tentimet për të shtrembëruar të vërtetën nuk do të kenë sukses, sepse “e vërteta del në pah edhe atëherë kur ata përpiqen ta shtrembërojnë për interesa të tyre”.

Statovci ka theksuar se mund të ketë vonesa dhe bllokada në procese, por ka thënë se është e bindur që fitorja e shumicës nuk mund të ndalet:

“Nuk ka forcë që e ndal jetësimin e fitores, sepse ajo buron nga gjykimi i qytetarit. Dhe në demokraci, fjala e tij është gjithmonë vendimtare”, ka shkruar Statovci.