Vetëvendosje zyrtarizon kandidaturën e Dr. Sylejman Mehollit për kryetar të Vushtrrisë

Lëvizja VETËVENDOSJE! ka shpallur zyrtarisht kandidaturën e Dr. Sylejman Mehollit për kryetar të komunës së Vushtrrisë, duke konfirmuar kështu fillimin e një kapitulli të ri në qeverisjen lokale.

Në një takim të mbajtur sot në Kalanë e Vushtrrisë, ku morën pjesë strukturat lokale të Lëvizjes, si dhe figura kyçe nga niveli qendror, përfshirë Kryeministrin Albin Kurti, Sekretarin Organizativ Alim Rama, ministrin Faton Peci dhe deputetët Salih Zyba, Fjolla Ujkani, Armend Muja dhe Valon Hoti, u dha mbështetja e plotë për fitoren e Dr. Mehollit në zgjedhjet lokale.

Dr. Meholli, kryetar i Qendrës së Lëvizjes në Vushtrri, përfaqëson një angazhim të fuqishëm qytetar dhe integritet të lartë personal. Ai dhe aktivistët e Lëvizjes premtojnë ta transformojnë Vushtrrinë në një komunë transparente dhe efikase, ku qytetarët do të jenë pjesë aktive e vendimmarrjes dhe bashkëqeverisjes.

Prioritetet e kandidatit përfshijnë mbështetjen për bujqësinë dhe sipërmarrësit lokalë, reformimin e shërbimeve komunale dhe garantimin e transparencës në çdo proces vendimmarrës.

“12 tetori është data e ndryshimit për Vushtrrinë edhe në nivelin lokal,” thuhet në njoftim, ndërsa Lëvizja VETËVENDOSJE! i uron suksese ekipit të saj dhe qytetarëve të Vushtrrisë në këtë rrugëtim të ri.