Igor Popoviq, ndihmësdrejtor në të ashtuquajturën “Zyra për Kosovën”, e udhëhequr nga Petar Petkoviq, është dërguar në paraburgim për 30 ditë.
Vendimi është marrë pas arrestimit të tij, si pasojë e deklaratave fyese që ai kishte dhënë ndaj Ushtrisë Çlirimtare të Kosovës (UÇK) gjatë një vizite në Rahovec.
Lajmin e ka konfirmuar Gjykata Themelore në Prishtinë përmes një njoftimi në Facebook.
“Igor Popoviq dyshohet për kryerjen e veprës penale “Nxitja e përçarjes dhe mosdurimit”. Gjyqtari i procedurës paraprake ka vlerësuar se paraburgimi është masa më e përshtatshme në këtë fazë të procedurës penale dhe se masat tjera alternative nuk do të garantonin zhvillimin normal të procesit gjyqësor”.
Pas seancës dëgjimore, gjykata ka theksuar se ekziston rreziku që, në mungesë të paraburgimit, i pandehuri të ndikojë në procedurën penale ose të pengojë rrjedhën e saj normale.
Palët e pakënaqura me këtë vendim kanë të drejtë ankese në Gjykatën e Apelit, përmes Gjykatës Themelore në Prishtinë.
