Më 14 korrik doli para panelit të Gjykatës së Apelit.
Kjo e fundit vendosi t’i ulë dënimin me burgim, ish-pjesëtarit të UÇK-së, Pjetër Shala.
Kështu nga 18 vjet, dënimi Shalës iu ul në 13 vjet burgim.
Por, në cilin shtet do ta vuaj dënimin Shala?
Nga Gjykata Speciale, thonë se kjo ende nuk është vendosur.
“Deri më tani nuk ka asnjë dokument publik apo vendim specifik lidhur me vendin ku zoti Shala do ta vuajë dënimin. Në përputhje me Kushtetutën, Ligjin për Dhomat e Specializuara dhe Zyrën e Prokurorit të Specializuar, si dhe Rregullat e Procedurës dhe Provave, pas shpalljes së një aktgjykimi përfundimtar, Presidenti i Dhomave të Specializuara të Kosovës, pasi ta dëgjojë personin e dënuar, do të vendosë në cilin shtet do të vuajë dënimin ai apo ajo”, thuhet nga Gjykata Speciale.
Monitoruesit e kësaj gjykate, tregojnë procedurat për përzgjedhjen e shtetit, ku i dënuari do ta vuaj dënimin.
“Pas marrjes së vendimit në shkallën e dytë, aktgjykimi është bërë i formës së prerë dhe sipas rregullave të rregullores së procedurave të provave, kryetarja e Gjykatës Speciale do të vendos se në cilin shtet do ta vuaj dënimin personi i dënuar. Në rastin konkret duhet të bëhet një listë e shteteve të cilat kanë shprehur interesim që t’i pranojnë personat e dënuar”, thotë Amer Alia- avokat.
Por, a mund të kërkoj i dënuari që dënimin ta mbaj në ndonjë shtet të caktuar?
“Ligji shprehimisht nuk e ka cekur, konkretisht rregullorja 166 e ka shprehur që kryetarja e Dhomave të Specializuara e merr vendimin, por më shumë detaje se duhet të jepet pëlqimi nga i dënuari, nuk është cekur në këtë nen”, tregon Alia.
Ndryshe, nga kjo Gjykatë, Pjetër Shala u gjet fajtor për krime luftë të kryera në vitin 1999, vendim që është kundërshtuar ashpër në Kosovë./teve1
