Drejtoria Rajonale e Policisë në Pejë njofton se me datën 16 korrik 2025, rreth orës 10:30, ka marrë informacion për të shtëna me armë zjarri në fshatin Qyshk të Pejës.
Njësitet policore kanë shkuar në vendngjarje dhe gjatë hetimeve ka rezultuar se dy persona të dyshuar ishin parkuar në objektin e viktimës. Pas një mosmarrëveshjeje, njëri nga të dyshuarit ka shtënë disa herë në ajër dhe më pas është larguar në drejtim të panjohur.
“Në vendngjarje janë sekuestruar dhjetë (10) gëzhoja, ndërsa në bastisjen e shtëpisë së të dyshuarit është gjetur dhe sekuestruar një OC-sprej. Njëri nga të dyshuarit është arrestuar dhe më pas është liruar në procedurë të rregullt me urdhër të prokurorit”, thuhet në njoftim.
Policia ka bërë të ditur se pas punës intensive hetimore, me 17 korrik 2025 rreth orës 19:30 është identifikuar dhe arrestuar edhe i dyshuari i dytë. Në posedim të tij janë gjetur dhe sekuestruar një armë AK-47 dhe një karikator.
I dyshuari i dytë ndalohet për 48 orë me vendim të prokurorit të shtetit, ndërsa ndaj tyre po zhvillohen hetime për veprat penale “përdorim i armës apo mjetit të rrezikshëm” dhe “mbajtje në pronësi, kontroll ose posedim të paautorizuar të armës”.
