Qeveria në detyrë ka reaguar e shqetësuar ndaj vendimit të fundit të Gjykatës Supreme, e cila e ka shfuqizuar Udhëzimin Administrativ për pajisjet fiskale, duke e cilësuar këtë akt si rezultat të një interpretimi të njëanshëm dhe arbitrar të ligjit.
Në vendim, Supremja ka thënë se qeveria dhe ministri në detyrë nuk kanë kompetenca për të nxjerrë akte nënligjore, prandaj ka shfuqizuar Udhëzimin Administrativ të nënshkruar nga ministri në detyrë i Financave, Hekuran Murati.
E Qeveria në detyrë e kundërshton vendimin duke theksuar se “neni 31 i Ligjit për Qeverinë nuk ndalon qeverinë në detyrë nga miratimi i akteve zbatuese, por vetëm nga vendimmarrjet madhore si projektligjet, marrëveshjet ndërkombëtare, amendamentet kushtetuese dhe strategjitë”.
Qeveria thekson se procedura për hartimin e Udhëzimit Administrativ kishte nisur më 20 nëntor 2024, në kohën kur ekzekutivi kishte mandat të plotë kushtetues, dhe për këtë arsye akti ka legjitimitet të plotë si në aspektin proceduror, ashtu edhe në atë substancial.
“Vendimi i Supremes është i brishtë logjikisht dhe kushtetueshëm: njeh qeverinë në detyrë, por mohon kompetencën e saj për të nxjerrë akte që nuk janë të ndaluara me ligj, duke krijuar një kontradiktë të qartë”, thuhet në reagim.
E për vendimin që deputeti nuk mund ta ushtrojë funksionin e ministrit, Qeveria pretendon se nuk mund të ketë konflikt funksional përderisa përbërja e re parlamentare nuk ka hyrë ende në funksion kushtetues.
“Sa i përket pretendimit për konflikt të mundshëm funksional ndërmjet funksionit të ministrit në detyrë dhe atij të deputetit, rikujtojmë se Gjykata Kushtetuese e Republikës së Kosovës, në Aktgjykimin KO124/25, në dispozitiv por edhe në paragrafin 93 ka sqaruar se “…. Si rezultat i moszgjedhjes së Kryetarit/es dhe nënkryetarëve, Kuvendi nuk ka arritur të konstituohet dhe për rrjedhojë i njëjti nuk është funksionalizuar si organ përfaqësues me autorizime ligjvënëse, vendimmarrëse dhe mbikëqyrëse të përcaktuara me Kushtetutë.” Ky Aktgjykim ka konstatuar qartë se Kuvendi i ri ende nuk është konstituuar, për shkak se Seanca Konstituive nuk mund të konsiderohet e përfunduar pa zgjedhjen e Kryetarit dhe Nënkryetarëve të Kuvendit. Rrjedhimisht, nuk mund të ketë konflikt funksional mes pozitave të ministrit në detyrë dhe të deputetit, përderisa përbërja e re parlamentare nuk ka hyrë ende në funksion kushtetues”.
Në fund të deklaratës, Qeveria paralajmëron përdorimin e mjeteve juridike për të kundërshtuar këtë vendim dhe për të “rikthyer ligjshmërinë dhe standardet demokratike”, duke theksuar përkushtimin e saj për respektimin e rendit kushtetues dhe funksionimin e pandërprerë të institucioneve.
