Prokurori i përgjithshëm i SHBA-së ka urdhëruar tërheqjen e akuzave kundër një mjeku të akuzuar për shkatërrimin e vaksinave COVID-19 me vlerë 28,000 dollarë, shpërndarjen e kartave të rreme të vaksinimit dhe dhënien e injeksioneve me tretësirë fiziologjike fëmijëve në vend të vaksinës me kërkesë të prindërve të tyre.
Pam Bondi tha se Dr. Michael Kirk Moore Jr. “u dha pacientëve të tij një zgjedhje kur qeveria federale refuzoi ta bënte këtë”.
Ai ishte paditur nga Departamenti i Drejtësisë nën administratën Biden në vitin 2023.
Bëhet e ditur se kirurgu plastik ishte tashmë në gjyq në Utah, ku ai ishte deklaruar i pafajshëm për të gjitha akuzat, përfshirë komplotin për të mashtruar SHBA-në, shkruan BBC.
Prokurori i përkohshëm i SHBA-së për distriktin e Utahut, Felice John Viti, paraqiti padi për të rrëzuar akuzat, duke thënë se kjo ishte “në interes të drejtësisë”.
Dr. Moore u akuzua për dhënien e certifikatave të vaksinimit të plotësuara në mënyrë mashtruese për më shumë se 1,900 doza vaksinash, njoftoi zyra e Prokurorit të SHBA-së në Utah në vitin 2023.
Këto dyshohet se u ofruan, pa administruar vaksinën, për një pagesë prej 50 dollarësh, në këmbim të pagesave të drejtpërdrejta në para ose donacioneve për një bamirësi specifike.
Qeveria gjithashtu e akuzoi atë se u dha fëmijëve injeksione me tretësirë fiziologjike me kërkesë të prindërve të tyre në mënyrë që “fëmijët të mendonin se po merrnin një vaksinë COVID-19”.
Ai u akuzua së bashku me kompaninë e tij – Instituti i Kirurgjisë Plastike të Utahut – dhe tre të tjerë për përpjekje për të mashtruar SHBA-në dhe Qendrat për Kontrollin dhe Parandalimin e Sëmundjeve (CDC).
Bondi tha se ajo kishte urdhëruar Departamentin e Drejtësisë të rrëzonte akuzat sepse Dr. Moore “nuk i meritonte vitet e burgut me të cilat po përballej”.
