Sekretari amerikan i Shtetit, Marco Rubio ka folur në Malajzi pas një takimi me ministrin e Jashtëm rus Sergei Lavrov.
Rubio tha se pati një “bisedë të sinqertë dhe të rëndësishme” me Lavrovin, duke theksuar se Uashingtoni “duhet të shohë një plan veprimi” se si mund të përfundojë lufta në Ukrainë.
Rubio tha se Donald Trump ishte i zhgënjyer që nuk kishte pasur “më shumë fleksibilitet” nga pala ruse në lidhje me Ukrainën, transmeton Telegrafi.
“Ne e kuptojmë që këto gjëra kërkojnë kohë dhe durim, por jemi të frustruar që nuk është bërë më shumë përparim”, tha ai.
Rubio shtoi se Rusia kishte ofruar një “qasje të re dhe të ndryshme” gjatë bisedimeve të sotme, pa u zgjeruar më shumë se çfarë përfshinte ajo.
“Nuk do ta karakterizoja si diçka që garanton paqen, por është një koncept që do t’ia çoj presidentit sot”, tha ai.
