Anëtarët e Komisionit Qendror të Zgjedhjeve kanë votuar për çregjistrimin e “Lëvizjes për Bashkim”, e cila pranë Zyrës për Regjistrim, Certifikim dhe Kontrollin Financiar të Subjekteve Politike ka dorëzuar vendimin dhe dokumentacionin mbështetës për pushimin e të gjitha aktiviteteve politike.
“Pas këtij vendimi, Zyra do të njoftojë Bankën Qendrore të Kosovës për bllokimin dhe deri në mbylljen e llogarisë bankare dhe Administratën Tatimore për fshirjen e numrit fiskal”, thuhet në njoftimin e KQZ-së.
KQZ-ja thotë se tutje në mbledhje, anëtarët e KQZ-së u njoftuan lidhur me ecurinë e zbatimit të planit të aktiviteteve për organizimin e Zgjedhjeve Lokale për Kryetarë të Komunave dhe për Kuvende Komunale, të cilat do të mbahen më 12 tetor 2025.
“Sipas raportit informues, është duke u zhvilluar periudha për ndërrimin e Qendrës së Votimit brenda komunës dhe që nga fillimi i saj më 28 qershor dhe deri më 9 korrik 2025, janë pranuar 633 kërkesa, prej të cilave 566 janë aprovuar, ndërkaq 66 të tjera janë refuzuar për shkak se nuk kanë bashkangjitur fotografinë e tyre duke mbajtur në dorë dokumentin identifikues”, thotë Komisioni Qendror i Zgjedhjeve.
Po ashtu, kanë treguar se anëtarët u njoftuan edhe për periudhën e aplikimit online për certifikimin e subjekteve politike dhe kandidatëve të tyre, e cila ka filluar më 26 qershor dhe do të përfundojë më 13 gusht 2025.
“Deri më tani, Zyra për Regjistrim, Certifikim dhe Kontrollin Financiar të Subjekteve Politike (ZRCKFSP) u ka krijuar qasje në platformën për certifikim 47 subjekteve politike të regjistruara, 6 iniciativave qytetare dhe 1 kandidati të pavarur”, ka bërë të ditur KQZ-ja rreth ecurisë së këtij procesi.
Njoftim pati edhe për përzgjedhjen e operatorit për aludimin e raporteve financiare të fushatës për zgjedhjet e 9 shkurtit.
“KQZ u njoftua se është përzgjedhur operatori fitues në procesin e prokurorimit “Auditimi i raporteve financiare të fushatës së zgjedhjeve për Zgjedhjet për Kuvendin e Kosovës 2025”. Së shpejti, auditorët do të fillojnë auditimin e raporteve financiare të subjekteve politike dhe raportet e audituara do të publikohen nga KQZ”, bëhet e ditur në njoftim.
