Qeveria në detyrë e Republikës së Kosovës ka mbajtur sot mbledhjen e 264-të, në të cilën janë miratuar një sërë vendimesh të rëndësishme në fushën e arsimit, kulturës, infrastrukturës, zhvillimit rajonal dhe punësimit.
Në fokus të mbledhjes ishte ndarja dhe rialokimi i fondeve për projekte kapitale dhe strategjike në disa komuna të vendit, si dhe përfshirja e mbështetjes ndërkombëtare për sigurinë e ujit.
Vendimet kryesore të miratuara janë:
580 mijë euro u ndanë për bashkëfinancimin e projektit për ndërtimin e Shkollës së Muzikës dhe Muzeut të Preshevës, në kuadër të mbështetjes për shqiptarët jashtë kufijve administrativë të Kosovës.
1.2 milionë euro u rialokuan për 10 projekte kapitale në po aq komuna: Dragash, Ferizaj, Gjakovë, Han i Elezit, Klinë, Mitrovicë, Podujevë, Shtime, Prizren dhe Mamushë. Mbështetja vjen si pjesë e Programit për Zhvillim Rajonal 2025, me synim nxitjen e zhvillimit të balancuar dhe të qëndrueshëm socio-ekonomik.
U miratua nisma për lidhjen e Marrëveshjes së Grantit me Asociacionin Ndërkombëtar për Zhvillim, për projektin “Programi – Nxitja dhe Levrimi i Mundësive për Sigurinë e Ujit, Faza 2”. Grant prej 1 milion dollarësh do të ndihmojë në ndërtimin e kornizës rregullatore për sigurinë e digave. Projekti do të zbatohet nga Ministria e Mjedisit, Planifikimit Hapësinor dhe Infrastrukturës.
U aprovua kërkesa e MKRS-së për transferimin e 712,215 eurove për mbulimin e obligimeve ndaj Federatës së Volejbollit dhe Komitetit Olimpik të Kosovës, bazuar në një Memorandum Mirëkuptimi.
U ndanë 2 milionë euro në kuadër të Masës 1.9 të Pakos së Ringjalljes Ekonomike, për të mbështetur punësimin e qytetarëve nga komunitetet joshumicë në mbarë vendin.
Qeveria ka theksuar se këto vendime janë në funksion të përmirësimit të infrastrukturës, mbështetjes së talenteve, ruajtjes së trashëgimisë kulturore dhe forcimit të përfshirjes sociale dhe ekonomike të të gjitha komuniteteve në Kosovë.
