Kryeministri në detyrë i Kosovës, Albin Kurti, ka njoftuar sot për fillimin e punimeve restauruese në Xhaminë e Sudi Efendisë, një objekt me rëndësi të madhe historike e fetare në zemër të Prishtinës.
E ndërtuar fillimisht si mesxhid në shekullin XVI dhe e zhvilluar më tej si xhami gjatë shekujve XVIII dhe XIX, kjo ndërtesë me vlerë të trashëgimisë kulturore ka qëndruar për një kohë të gjatë në gjendje të rëndë fizike dhe pa përkujdesje institucionale. Sipas Kurtit, ndërtimet dhe lokalet përreth i kanë marrë edhe hapësirën edhe vëmendjen që kjo xhami e vjetër meriton.
“Tashmë ajo e ka vëmendjen tonë,” shkroi Kurti në një postim në rrjetet sociale, duke njoftuar se projektet e restaurimit përfshijnë konsolidimin e strukturës së xhamisë, largimin e lokaleve përreth dhe, në fund, rikthimin e saj në përdorim nga komuniteti i besimtarëve myslimanë.
Ky projekt është shpallur si një ndër prioritetet kryesore për restaurim në kuadër të bashkëpunimit ndërmjet Ministrisë së Kulturës, Rinisë dhe Sportit dhe Bashkësisë Islame të Kosovës. Vlera totale e investimit të Ministrisë së Kulturës kap shumën prej 639,776.36 euro.
Punimet pritet të kthejnë shkëlqimin historik të xhamisë, duke i dhënë qytetit një hapësirë të restauruar si trashëgimi fetare dhe kulturore.
