I gjithë trafiku ajror në aeroportin e Bergamos pranë Milanos u ndërpre sot për gati dy orë, pasi një burrë humbi jetën kur u përthith nga motori i një aeroplani që po përgatitej për të ngritur.
Policia dhe zjarrfikësit ndërhynë menjëherë në vendngjarje në aeroportin, i cili ndodhet rreth 60 kilometra në lindje të Milanos, dhe është hapur një hetim për të përcaktuar rrethanat e sakta të incidentit.
Në profilin zyrtar të aeroportit në rrjetet sociale u konfirmua ndalimi i trafikut “për shkak të një problemi të ndodhur në pistë”, dhe u theksua se autoritetet kompetente janë duke e hetuar ngjarjen.
Gjatë pezullimit u anuluan të paktën tetë fluturime nisjeje, ndërsa fluturimet që mbërrinin u devijuan në aeroporte të tjera të rajonit, përfshirë ato në Bolonjë, Verona dhe Milano Malpensa, raportoi agjencia italiane e lajmeve ANSA.
Aeroplani Airbus A319 i kompanisë me kosto të ulët Volotea ishte planifikuar të nisej nga Bergamo drejt Asturias, në veri të Spanjës, kur ndodhi aksidenti.
Sipas raportimeve, tragjedia ndodhi pak pas përfundimit të imbarkimit, në kohën kur aeroplani po lëvizte ngadalë drejt pistës.
ANSA shkruan se besohet që viktima ka hyrë në pistë me qëllimin për t’i dhënë fund jetës. Burri, i cili nuk ishte as pasagjer dhe as punonjës i aeroportit, kishte shmangur sigurinë dhe kishte vrapuar drejt aeroplanit ndërsa ai tashmë ishte në lëvizje.
Autoritetet deri tani nuk kanë bërë publik identitetin e viktimës.
