Gjykata Themelore në Prishtinë ka dënuar me 9 vjet e gjashtë muaj burg dhe 500 euro gjobë tre të akuzuarit për rrëmbimin dhe keqtrajtimin e një burri.
Qendra për Zhvillimin e Grupeve Shoqërore (CSGD) ka njoftuar për vendimin e gjykatës, ndërsa ka thënë se keqtrajtimi i viktimës kishte ndodhur për shkak të orientimit të tij seksual, transmeton KosovaNews.
CSGD-ja në një komunikatë për media ka përshëndetur vendimin e gjykatës, duke thënë se kjo shënon një precedent të rëndësishëm për mbrojtjen ligjore të personave LGBTQ+ në Kosovë.
Reagimi i plotë nga CSGD-ja:
Vendimi i Gjykatës Themelore në Prishtinë për veprat penale ndaj një personi gej shënon një precedent të rëndësishëm për mbrojtjen ligjore të personave LGBTQ+ në Kosovë
Qendra për Zhvillimin e Grupeve Shoqërore (CSGD) përshëndet vendimin e Gjykatës Themelore në Prishtinë që ka shqiptuar dënime ndaj tre të pandehurve në lidhje me rastin e rrëmbimit dhe keqtrajtimit të një burri gej.
Gjykata vendosi në total prej 9 vjet e gjashtë muajsh burgim dhe një gjobë prej 500 eurosh, duke zbatuar për herë të parë veprën penale të motivuar në bazë të ORIENTIMIT SEKSUAL.
Ky vendim përfaqëson një moment kyç në avancimin e drejtësisë për viktimat e dhunës së motivuar nga urrejtja në Kosovë dhe CSGD e konsideron atë si një zhvillim pozitiv për disa arsye thelbësore, sepse:
- Dërgon mesazh të qartë se dhuna e bazuar në orientim seksual nuk tolerohet dhe do të ndëshkohet me forcën e ligjit.
- Vendos një precedent konkret për aplikimin e dispozitave rënduese në raste të ngjashme në të ardhmen, duke kontribuuar në mbrojtjen më të fuqishme të të drejtave të personave LGBTQ+.
Përgjatë gjithë procesit, CSGD ka mbështetur viktimën përmes ofrimit të ndihmës ligjore dhe monitorimit të rregullt të procedurave gjyqësore. Ky rast është një dëshmi e nevojës për bashkëpunim të ngushtë ndërmjet shoqërisë civile dhe institucioneve të drejtësisë në luftën kundër krimeve të urrejtjes dhe në sigurimin e një shoqërie më të drejtë dhe më të barabartë për të gjithë.
