Pamjet e një të moshuare që përpiqej me ngulm të fliste me kryeministrin Edi Rama gjatë një vizite të tij në Vlorë janë bërë virale në rrjet.
82-vjeçarja Katina Thanasi, ka rrëfyer të gjithë përplasjen me forcat e rendit dhe bisedën që pati me kreun e qeverisë.
Katina tregoi se për t’u afruar te Rama, u shty me disa efektivë policie dhe truproja të kryeministrit.
Ajo thotë se nuk kishte ndërmend të tërhiqej pa e takuar dhe pa i shprehur shqetësimin që ka për kanalin afër banesës së saj, i cili, sipas saj, nuk është pastruar prej më shumë se dy vjetësh.
“Jam Katina Thanasi, 82 vjeçare. Doli Rama, më rrethuan policët se s’donin të më linin ta takoja. I shtyva, më shtynë. Më thanë do të arrestojmë. I thashë: ‘S’më arrestoni dot, s’kam bërë ndonjë gjë.’ E thirra Ramën: ‘Mos ik, se të dua për kokë të djalit!’ Ai ndaloi. Më pyeti: ‘Pse bërtet?’ dhe unë i tregova hallin: kanali duhet pastruar”, tregoi ajo për Euronewsal.
Katina tha se problemin e kanalit ia ka parashtruar edhe kryetarit të bashkisë, por për afro tre vjet nuk është ndërmarrë asnjë veprim.
“I thashë edhe Ramës që kam dy vjet e gjysmë që i lutem bashkisë të më pastrojnë kanalin dhe nuk kanë ardhur. Kam frikë nga mushkonjat, nga mbeturinat, nga qentë e ngordhur që i hedhin aty,” u shpreh ajo.
E pyetur nëse pas takimit me kryeministrin pret që çështja të zgjidhet, ajo shprehet skeptike.
“Nuk kam shpresë pa e parë me sy. Dy djem erdhën dhe pyetën nëse mund të hyjnë te toka e fqinjit për ta pastruar, por ende nuk kanë hyrë. Thonë që s’lejohen,” thotë 82-vjeçarja.
Edhe pse takimi me Ramën ishte moment i veçantë për të, Katina mbetet e vendosur: “Nëse nuk vijnë ta pastrojnë, nesër jam sërish aty. Për kokë të djalit tim, nuk ndalem!” – përfundon ajo.
