Avokati i familjes Dehari, Tomë Gashi, ka thirrur për sot konferencë për media pasi pretendon se “sipas të gjitha rrethanave”, Astrit Dehari është goditur në ballë me boks të hekurit.
Konferenca do të nisë nga ora 12:00, mbi Kino ABC.
Për këtë çështje, Gashi ka shkruar dje në Facebook, duke akuzuar për neglizhencë të prokurorisë për këtë rast dhe tha se kjo neglizhencë “po vret”.
“Ekspertiza e Institutit Zviceran të mjekësisë ligjore e vitit 2019 e vërteton vrasjen, duke konstatuar se me mënyrë shkencore është eliminuar edhe teoria e vetëvrasjes dhe u vërtetua prania e ADN-së të personave të tretë”, ka thënë ai.
Gjithashtu, avokati Gashi ka theksuar se para katër muajsh i është drejtuar me shkrim prokurorit të rastit, Afrim Shefkiut, mirëpo, sipas tij, deri më tash nuk ka marrë përgjigje.
“Prokurorit të rastit Afrim Shefkiu me shkrim, që katër muaj, i kërkuam që të iniciojë hetim penal dhe të identifikojë se kush i manipuloi provat e dërguara në Zvicër, prokurori nuk përgjigjet fare. Prokurorit të rastit i janë bërë dhjetëra kërkesa, në të cilat ai nuk është përgjigjur asnjëherë dhe njëra prej tyre është që të kërkojë sqarime nga ekspertët e mjekësisë ligjore në Prishtinë lidhur me plagët e shkaktuara te Astrit Dehari në ballë e që janë në forma sferike të rrumbullakëta dhe që kanë largësi e diametër të njëjtë dhe, sipas të gjitha rrethanave, janë shkaktuar me goditje me boks të hekurit”.
Kujtojmë se besimi i publikut në Kosovë ndaj institucioneve brenda sistemit të drejtësisë në vend është luhatur ndër vite në Kosovë, por asnjëherë si për rastin e aktivistit Astrit Dehari.
Astrit Dehari gjeti vdekjen më 5 nëntor të vitit 2016 teksa po mbahej në Qendrën e Paraburgimit në Prizren.
Për rastin e tij Prokuroria e Kosovës kishte pushuar hetimet, me konstatimin se bëhej fjalë për vetëvrasje.
Por pas insistimeve të shumta dhe bërjes së ekspertizës nga Instituti i Mjekësisë Ligjore në Lozanë të Zvicrës, vetëvrasja u largua si opsion dhe kjo e detyroi Prokurorinë që të vazhdojë hetimin e këtij rasti dhe do t’i ndërmarrë të gjitha veprimet e nevojshme.
Mirëpo rasti i Astrit Deharit edhe pas gjithë kësaj kohe nuk ka marrë epilog dhe askush nuk është nxjerrë përgjegjës./KosovaNews/
