Ministri në detyrë i Financave, Punës dhe Transfereve, Hekuran Murati, ka reaguar ashpër ndaj pezullimit të tenderit për rehabilitimin e bllokut A3 të termocentralit “Kosova A”, duke akuzuar opozitën e deritashme për pengim të qëllimshëm të projekteve që rrisin sigurinë dhe kapacitetet energjetike të vendit.
Sipas Muratit, tenderi për rehabilitim është sulmuar që nga fillimi nga deputetja opozitare Hykmete Bajrami, ndërsa sot është pezulluar nga OSHP-ja me arsyetimin se përmban kritere diskriminuese për kompanitë vendore.
“Po cilat kompani lokale kanë kapacitet për rindërtim të termocentraleve?”, ka pyetur Murati, duke nënvizuar se një vendim i tillë do të sjellë vonesa të reja në procesin e rehabilitimit të bllokut A3.
Murati ka përmendur disa raste të tjera kur, sipas tij, opozita ka bllokuar apo penguar projekte të rëndësishme për sektorin energjetik, përfshirë kontratën me kompaninë General Electric për ndërrimin e turbinave në TC “Kosova B”, marrëveshjen me Bankën Evropiane të Investimeve për ndërtimin e kapaciteteve solare 100 MW në KEK, si dhe projektin me Bilfinger për rehabilitimin e të gjitha blloqeve në TC “Kosova A”, një projekt që, sipas Muratit, ishte penguar pikërisht në kohën kur Bajrami ishte ministre.
“Sa herë që KEK tenton të rrisë kapacitetet furnizuese, i shihni si bëjnë çmos që ta pengojnë e vonojnë, këta që vazhdimisht pretendojnë se ua qajnë hallin qytetarëve”, ka theksuar Murati.
Ai ka ftuar qytetarët që, sipas tij, “ta vlerësojnë vetë se kush po i shërben interesit publik dhe kush po i shërben mafisë energjetike”.
