Kryetari i partisë Guxo, Faton Peci, pas takimit me presidenten e republikës, Vjosa Osmani, ka deklaruar se kreu i shtetit ka shprehur gatishmëri për të kontribuar në zhbllokimin e situatës politike nga pozita që ka.
“Presidentja shprehu vullnetin dhe qëndrimin dhe gatishmërinë që të kontribojë nga pozicioni që ajo ka për të zhbllokuar gjendjen. Ne po duam me besu që gjatë ditëve në vijim, para datës 26 korrik, partitë e tjera do të kenë mundësinë e reflektimit dhe gjetjes së konsensusit”, tha ai.
Peci komentoi edhe paqartësitë që ekzistojnë rreth afateve kushtetuese dhe mundësinë që presidentja t’i drejtohet Gjykatës Kushtetuese për interpretim të mëtejmë.
“Çështja është që ka paqartësi, secili do të jetë veprimi dhe nuk është lehtë i parashikueshëm se cilat do të jenë sekuencat. Në një rrethanë të tillë ekziston mundësi reale që edhe presidentja t’i drejtohet Gjykatës Kushtetuese se çka ka dashtë momentin që ka vendosur afatin 30-ditësh. Kur dihet se ky afat 30-ditësh veçse ka kaluar – 30 ditëshi i moskonstituimit të kuvendit – nëse marrim shkas datën 15 prill,” deklaroi ai.
