Kryeministri në detyrë i Republikës së Kosovës, Albin Kurti, ka njoftuar se ka zhvilluar një takim të gjatë me presidenten Vjosa Osmani, me fokus kryesor konstituimin e Kuvendit të ri në dritën e aktgjykimit të fundit të Gjykatës Kushtetuese.
“Afatet po rrjedhin. Në javën e fundit të korrikut duhet që ta konstituojmë legjislaturën e nëntë,” ka theksuar Kurti, duke shtuar se janë të përkushtuar që ky proces të ndodhë përmes bashkëpunimit, konsultimeve të dendura dhe frymës së kompromisit.
Ai ka bërë të ditur se presidentja Osmani gjatë ditës do të zhvillojë takime me përfaqësues të partive tjera politike për të parë nëse është bërë përparim në drejtim të arritjes së një konsensusi.
“Le t’i japim shansin edhe takimeve të tjera deri në fund për të parë se cili është progresi për të cilin jemi të interesuar të gjithë,” ka shtuar Kurti.
