Qytetarë serbë pritet ta bllokojnë rrugën drejt pikës kufitare Merdarë – autoritetet u bëjnë thirrje udhëtarëve të shmangin këtë drejtim
Qendra Kombëtare për Menaxhim Kufitar ka njoftuar se sot, me datë 1 korrik, duke filluar nga ora 18:00, rruga e cila shpien në PKK Merdarë nga Serbia do të jetë e bllokuar nga qytetarë serbë, të cilët pritet të pengojnë qarkullimin e lirë në këtë segment rrugor.
Për të shmangur vonesat dhe pengesat e mundshme në këtë rrugë, udhëtarët janë këshilluar të shfrytëzojnë pikat e tjera kufitare alternative, deri në një njoftim të ri.
“Me qëllim të evitimit të kësaj rruge dhe pengesave në drejtim të PKK Merdarë, inkurajojmë udhëtarët që të shfrytëzojnë pika të tjera kufitare deri në një njoftim tjetër”, thuhet në njoftimin zyrtar.
Për informata të mëtejshme, qytetarët mund të kontaktojnë në numrat:
045198000
045198606
Numri pa pagesë: 080050095
Autoritetet kanë falënderuar qytetarët për mirëkuptim dhe bashkëpunim.
