Kryeministri në detyrë, Albin Kurti theksoi se është obligim i të gjithë deputetëve të zgjedhur më 9 shkurt dhe të betuar më 19 prill që të mundësojnë funksionalizimin e Kuvendit, përmes zgjedhjes së kryetares dhe pesë nënkryetarëve.
Ai kujtoi se Gjykata Kushtetuese ka kërkuar bashkëpunim në mirëbesim dhe kompromis mes grupeve parlamentare.
Kurti deklaroi se Lëvizja Vetëvendosje ka bërë lëvizje kompromisi për të zhbllokuar situatën:
Kandidati të tërhiqet nëse nuk merr 61 vota në komision.
Një marrëveshje politike në pako, ku opozita mund të delegojë përfaqësuesit për ta rrëzuar kandidatin me votë nëse nuk janë dakord.
“Është obligim, detyrë e të gjithë deputetëve të dalim nga zgjedhjet e 9 shkurtit dhe të betuar më 19 prill. 19 prilli për këtë legjislaturë ishte dita më e mirë sepse ishte momenti i hapjes, ishin 120 deputetë dhe të gjithë votuan. Mirëpo këta deputetë kanë nevojë për shtëpinë e tyre dhe ajo është Kuvendi, për t’u bërë kjo duhet të zgjidhet kryetarja dhe pesë nënkryetarë, është e paraparë. Është e vërtetë që ne si VV e kemi përgjegjësinë kryesore për formimin e qeverisë dhe formimin e Kuvendit, e ka thënë edhe Gjykata Kushtetuese. Duhet theksuar në këtë rast që Gjykata Kushtetuese ka theksuar që gjykata nuk zgjidh mosmarrëveshjet politike midis grupeve parlamentare, ka përmendur bashkëpunim në mirëbesim, konsultim konstruktiv dhe kompromis. Ne e bëmë edhe konsultimin edhe bashkëpunimin në mirëbesim, por u pa që konsensus nuk u bë, sa i përket kompromisit ne kemi lëvizur”, deklaroi Kurti.
Ai u shpreh se opozita nuk pranoi asnjërin nga këto opsione.
“Kam ofruar dy opsione kompromisi në emër të LVV-së, kompromisi i parë ishte ai që e ka thënë Albuklena, në rast se nuk i merr 61 vota në komision, tërhiqet nga kandidatura. Kjo nuk ju kishte bërë përshtypje opozitës. Opsioni i dytë është ta bëjmë marrëveshje politike, e cila është marrëveshje me pako dhe më pas, nëse nuk e duan votimin e shpejtë, të delegojnë përfaqësuesit e tyre të cilët mund ta rrëzojnë me votë”, shtoi ai.
