Kryeministri në detyrë, Albin Kurti, gjatë mbledhjes së sotme të Qeverisë, tha se sipas vlerësimeve të institucioneve të sigurisë, Serbia po përpiqet ta bëjë sa më masive festën e Vidovdanit në Kosovë, përmes organizimeve të ndryshme, transmeton KosovaNews.
“Sipas informacioneve të sigurisë, nesër, kur serbët shënojnë Vidovdanin, janë organizuar grupe të shumta nga Serbia, Mali i Zi dhe Bosnja e Hercegovina për të ardhur në Kosovë. Tradicionalisht, këto grupe kanë qenë provokuese, duke bartur simbole nacionaliste serbe dhe ruse, që bien ndesh me vlerat demokratike evropiane,” tha Kurti.
Ai u bëri thirrje qytetarëve, e në veçanti komunitetit serb, që të mos lejojnë të keqpërdoren për qëllime politike.
“U bëjmë thirrje të gjithë qytetarëve tanë që të mos bien pre e asnjë provokimi në ditën e nesërme. Tubimet për Vidovdanin duhet të zhvillohen në përputhje me ligjin dhe jo të shfrytëzohen për instrumentalizim politik nga Beogradi, i cili po tenton të eksportojë krizën e vet të brendshme politike në Kosovë, për t’u paraqitur më pas si mbrojtës i interesave kombëtare,” theksoi ai.
Kurti komentoi edhe zhvillimet ndërkombëtare, duke përmendur Samitin e NATO-s në Hagë, ku – siç tha – është përshëndetur rritja e buxheteve për mbrojtje.
“Ne jemi të palëkundur në synimin tonë për anëtarësim në NATO. Sot, Forcës së Sigurisë së Kosovës (FSK) i shtuam edhe 350 rekrutë të rinj,” deklaroi Kurti.
Ai theksoi se nuk do të tolerohen veprime që cenojnë rendin dhe paqen publike në vend.
