Kryeministri izraelit, Benjamin Netanyahu, ka deklaruar se Izraeli ka arritur një “fitore historike” kundër Iranit pas një fushate 12-ditore sulmesh ajrore dhe operacionesh të përbashkëta me Shtetet e Bashkuara të Amerikës.
Në një fjalim drejtuar kombit, Netanyahu tha se sulmet kishin shkatërruar tërësisht objektivat kryesore të programit bërthamor dhe atë të raketave balistike të Iranit. Ai shtoi se Izraeli ka shkaktuar “goditjen më të rëndë në historinë e regjimit iranian”.
“Ne kemi shkatërruar qendrat e prodhimit të raketave balistike dhe shumicën e lëshuesve të tyre. Forcat tona kanë dëmtuar rëndë infrastrukturën ushtarake dhe shkencore të regjimit të Teheranit”, u shpreh Netanyahu.
Ai falënderoi presidentin amerikan Donald Trump për, siç tha, “angazhimin e tij të paprecedentë në mbrojtje të Izraelit dhe në eliminimin e kërcënimit bërthamor iranian”.
“Izraeli nuk ka pasur kurrë një mik më të madh në Shtëpinë e Bardhë sesa Presidenti Trump. Bashkëpunimi ynë ishte vendimtar dhe unë e falënderoj për punën tonë të përbashkët”, tha Netanyahu.
Sipas raportimeve ndërkombëtare, sulmet e koordinuara të SHBA-së dhe Izraelit shkatërruan objektiva të rëndësishëm si vendet e pasurimit të uraniumit në Fordow, Natanz dhe Isfahan. Burime nga administrata amerikane konfirmuan përdorimin e bombave “bunker-buster” për të goditur zonat nëntokësore.
Pas përshkallëzimit të dhunës dhe shkëmbimeve intensive të zjarrit, një armëpushim është vendosur mes Izraelit dhe Iranit. Marrëveshja u ndërmjetësua nga presidenti Trump, i cili reagoi ashpër ndaj shkeljeve të para të saj nga të dyja palët dhe kërkoi ndalimin e menjëhershëm të veprimeve ushtarake.
“Ky është një moment vendimtar për sigurinë e rajonit dhe për të ardhmen e paqes”, citohet të ketë thënë Trump.
Ndërkohë, burime në Teheran e kanë përshkruar fundin e ofensivës si një “përfundim strategjik”, ndonëse vëzhguesit ndërkombëtarë thonë se programi bërthamor iranian mund të rikthehet në kapacitete të pjesshme brenda disa muajsh.
Netanyahu theksoi se Izraeli do të vazhdojë të jetë vigjilent dhe nuk do të lejojë rikthimin e ndonjë kërcënimi nga Irani. Ai shtoi se pas këtij operacioni, fokusi i vendit do të rikthehet në konfliktin në Gaza dhe lirimin e pengjeve.
