Policia e Kosovës ka ndërmarrë një fushatë vetëdijësuese në rajonin e Mitrovicës së Veriut, me qëllim të parandalimit dhe luftimit të ngacmimit seksual. Fushata është zhvilluar përmes shpërndarjes së fletushkave informuese në katër komunat që përfshin ky rajon: Mitrovicë e Veriut, Zveçan, Leposaviq dhe Zubin Potok.
Fletushkat janë shpërndarë në vende publike si rrugë, sheshe dhe zona të frekuentuara nga qytetarët, për të informuar opinionin publik mbi natyrën e ngacmimit seksual, mënyrat e manifestimit të tij dhe rrugët për ta raportuar.
Policia ka theksuar rëndësinë e raportimit dhe ka përcjellë disa mesazhe kyçe për qytetarët:
- Çdo ngacmim është i dënueshëm me ligj
- Ngacmimi nuk është kompliment – është krim
- Raportimi ndihmon në mbrojtjen e viktimave dhe ndjekjen e autorëve
- Çdo rast trajtohet me konfidencialitet të plotë
Qytetarët mund të raportojnë rastet e ngacmimeve seksuale në disa mënyra:
- Përmes numrit pa pagesë 192
- Nëpërmjet aplikacionit “Lajmëro Policinë”
- Ose duke u paraqitur në çdo stacion policor në vend
Policia e Kosovës u bën thirrje të gjithë qytetarëve që të mos heshtin përballë ngacmimit seksual, por të reagojnë dhe raportojnë, duke kontribuar kështu në ndërtimin e një ambienti më të sigurt dhe të dinjitetshëm për të gjithë.
