Janë bërë një javë që kur ish-pjesëtari i Njësisë Speciale të Policisë së Kosovës, Arbnor Spahiu u arrestua nga autoritetet serbe në kufirin mes Hungarisë dhe Serbisë, në Hogrosh.
Pas arrestimit, autoritetet serbe i caktuan një muaj paraburgim ish-zyrtarit policor. Spahiu po dyshohet për kryerjen e veprës penale “vrasje e rëndë” në Banjskë, në vendin ku grupi i serbëve të armatosur ka sulmuar Policinë e Kosovës në shtator të vitit 2023, duke vrarë rreshterin Afrim Bunjaku.
Avokati Arianit Koci ka bërë të ditur për Telegrafin se në fund të javës që shkoi kanë dorëzuar ankesë rreth kësaj çështje.
“Është dorëzua ankesa dhe brenda dy apo tri ditëve pritet të vendoset. Nëse ka pak drejtësi Arbnori do të lirohet shumë shpejt”, ka thënë Koci.
Ditë më parë avokati tha se aktakuza ndaj ish-pjesëtarit të Njësisë Speciale është ngritur nga BIA serbe.
Autoritetet kosovare kanë bërë të ditur se janë angazhuar maksimalisht për lirimin e tij.
Kryeministri në detyrë Albin Kurti, ditë më parë vizitoi familjen e ish-zyrtarit policor, ku i siguroi që angazhimi është maksimal dhe do të jetë i tillë deri në lirimin e tij.
Ndaj arrestimit të Arbnor Spahiut ka reaguar edhe presidentja Vjosa Osmani, e cila e ka cilësuar këtë veprim si arbitrar dhe të motivuar politikisht.
Osmani tha se arrestimet e qytetarëve të Kosovës nga Serbia gjatë kalimit kufitar janë veprime të ngjashme me ato të regjimeve shoviniste të viteve ’90.
Në vazhdën e arrestimeve të kohëpaskohshme të shtetasve të Kosovës, autoritetet bëjnë vazhdimisht thirrje që të shmanget udhëtimi përmes Serbisë.
