Policia e Kosovës ka ndërmarrë një aksion të suksesshëm mbrëmjen e 14 qershorit në qytetin e Prizrenit, në bashkëpunim me Prokurorinë Themelore, me qëllim të garantimit të rendit dhe sigurisë publike.
Sipas njoftimit zyrtar, operacioni është zhvilluar në disa lokale nate të tipit bar-lounge, ku janë kontrolluar persona të dyshuar. Si rezultat, katër prej tyre janë kapur me mjete të ftohta (thika) në brez, ndërsa një tjetër është gjetur me armë zjarri.
“Janë kontrolluar disa lokale të natës (bar-lounge), ku si rezultat i kontrollit policor, katër personave të dyshuar u janë gjetur mjete të mprehta (thika) në brez, ndërsa një personi tjetër i është gjetur dhe sekuestruar një armë zjarri,” thuhet në njoftim.
Të gjithë të dyshuarit janë arrestuar dhe janë intervistuar në prani të avokatëve të tyre, ndërsa me urdhër të prokurorit janë ndaluar për 48 orë.
“Pesë të dyshuarit janë arrestuar, intervistuar në prani të avokatëve mbrojtës, dhe me vendim të prokurorit të shtetit janë dërguar në ndalim policor për 48 orë,” bëhet e ditur më tej.
Ndaj tyre është iniciuar procedurë penale për veprën: “Mbajtje në pronësi, kontroll ose posedim të paautorizuar të armëve”, ndërsa armët dhe mjetet e sekuestruara do të shërbejnë si prova materiale.
Policia e Kosovës rithekson përkushtimin e saj në ruajtjen e sigurisë dhe në parandalimin e veprimtarive të jashtëligjshme.
“Policia e Kosovës mbetet e përkushtuar në ofrimin e sigurisë për të gjithë qytetarët dhe në parandalimin e veprimtarive të kundërligjshme,” përfundon njoftimi.
