Gjykata Themelore në Prishtinë, Departamenti për Krime të Rënda ka aprovuar kërkesën e Prokurorisë Themelore në Prishtinë duke caktuar masën e paraburgimit në kohëzgjatje prej një muaji ndaj të pandehurve Venhar Hana dhe Dritmir Islami për shkak të dyshimit të bazuar se kanë kryer veprat penale Falsifikim i dokumentit dhe Mashtrimi ndërsa i pandehuri V.H dyshohet se ka kryer edhe veprën penale Legalizimi i përmbajtjes e rreme.
Pas mbajtjes së seancës dëgjimore, gjyqtari i procedurës paraprake vlerësoj se caktimi i masës së paraburgimit në këtë çështje penale është masë adekuate sepse nëse të pandehurit lihen në liri, mund t’i shmangen procedurës penale dhe mund të jenë të pakapshëm për organet e drejtësisë.
Po ashtu të njëjtit nëse gjenden në liri mund të asgjësojnë, fshehin, falsifikojnë provat e veprës penale ose mund të pengojnë rrjedhën normale të procedurës penale, po ashtu mund të ndikojnë tek personat të tjerë që eventualisht mund të jenë të implikuar në këto veprime.
Gjykata ka vlerësuar se caktimi i masës së paraburgimit është masa e vetme tani për tani për të siguruar prezencën e dy të pandehurve në këtë çështje penale dhe se çdo masë tjetër do të ishte e pamjaftueshme per zabtimin e suksesshëm të procedures penale, pengimin e rrjedhës normale të kësaj procedure penale si dhe pengimin e përsëritjes së veprave penale.
Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.
