Lëvizja Vetëvendosje ka zyrtarizuar Valon Prebrezën kandidat për kryetar komune nga në Fushë-Kosovë. Me Prebrezën i i futemi fuqishëm betejës për ta realizuar ndryshimin në nivelin lokal që aq shumë u duhet banorëve të Fushë Kosovës, thuhet në njoftimin e VV-së.
“Sot, në prani të kryesisë së Qendrës së Lëvizjes VETËVENDOSJE! në Fushë Kosovë dhe të gjitha strukturave drejtuese në Pika, me pjesëmarrje të Kryeministrit Kurti, Sekretarit Organizativ Rama, Koordinatorit të Qendrave dhe deputetit Zyba dhe kryetarit të qendrës, Shpend Bardiqi, konfirmuam mbështetjen për nominimin e Valon Prebrezës si kandidat për kryetar të Komunës së Fushë Kosovës.
Katrahurës së madhe të shkaktuar nga keqqeverisja e deritanishme lokale në Fushë Kosovë do t’i përgjigjemi me alternativën më të mirë qeverisëse për këtë komunë. Valon Prebreza dhe Lëvizja VETËVENDOSJE! janë zgjidhja për përmirësimin e jetesës për qytetarët në Fushë Kosovë.
Frymën e investimeve të Qeverisë Qendrore, të cilat kanë zgjidhur probleme dhjetëra vjeçare për lagjet e fshatrat e Fushë Kosovës, siç është rrjeti i ujësjellësit në disa fshatra dhe projekte të tjera, do ta vazhdojmë edhe në nivelin lokal”, thuhet në postimin e VV-Së.
Sipas VV-së, Valon Prebreza ka dëshmuar, edhe me angazhimin e tij të deritanishëm, se është i përkushtuar dhe i vendosur për t’i prirë transformimit që i duhet Komunës së Fushë Kosovës.
“Le të angazhohemi çdo ditë, gjithandej lagjeve e fshatrave të Fushë Kosovës, për fitoren e madhe që u duhet të gjithëve. E reja do të ngadhënjejë mbi të vjetrën, e reja do të triumfojë në Fushë Kosovë e për qytetarët.
Urime të gjithë qytetarëve të Fushë Kosovës dhe aktivistëve të Lëvizjes!
Na priftë e mbara!”, thuhet në njoftim
