Presidenti amerikan Donald Trump ka deklaruar se Shtetet e Bashkuara do të jenë “shumë, shumë të ashpra” me Rusinë, nëse bëhet e qartë se lufta në Ukrainë nuk do të përfundojë së shpejti. Deklaratën ai e dha gjatë një takimi me kancelarin gjerman Friedrich Merz në Shtëpinë e Bardhë, ku u diskutuan çështje si agresioni rus, situata në Ukrainë dhe tregtia mes dy vendeve.
Por Trump shtoi një koment që ka ngjallur reagime dhe shqetësime te aleatët e Ukrainës:
“Mund të ketë sanksione për të dyja palët, për të qenë i sinqertë. Duhen dy për të vallëzuar,” tha ai, duke lënë të hapur mundësinë që edhe Ukraina të përballet me masa ndëshkuese, raportom The Guardian.
Presidenti amerikan e përshkroi luftën si një “masakër” dhe shtoi se do të jetë i vendosur ndaj çfarëdo pale që e zgjat konfliktin:
“Është një gjakderdhje ajo që po ndodh atje. Do të jemi të ashpër, qoftë me Rusinë apo këdo tjetër.”
Ai përdori një analogji me sportin e hokejit, duke thënë se ndonjëherë lejohen palët të përplasen mes tyre para se të ndërhyhet, por theksoi se situata është shumë e ndërlikuar:
“Ka shumë urrejtje mes atyre dy burrave – mes palëve në luftë. Është një situatë shumë e vështirë.”
Trump tha gjithashtu se presidenti rus Vladimir Putin i kishte deklaruar se “nuk kishte zgjidhje tjetër veçse të sulmonte”, si reagim ndaj sulmeve të fundit të Ukrainës brenda territorit rus.
“I thashë: mos e bëj, duhet ta ndalosh. Por ka shumë urrejtje,” tha Trump.
Kancelari gjerman Friedrich Merz u shpreh se Gjermania mbetet e përkushtuar për të ndihmuar në fundin e pushtimit rus dhe kërkoi koordinim më të ngushtë me SHBA-në në këtë drejtim. Ai kujtoi se nesër shënohet përvjetori i Ditës D dhe shtoi se:
“Kemi mbështetur Ukrainën dhe kemi ushtruar presion ndaj Rusisë. Duhet të flasim për këtë.”
Trump u përgjigj shkurt: “Do të flasim për këtë.”
