Rozeta Hajdari, ministre në detyrë e Inovacionit, Ndërmarrësisë dhe Tregtisë, u takua me z. Michael Wolf, pronar i kompanisë gjermane Wolf Bavaria GmbH, dhe bashkëpuntorët e tij nga diaspora kosovare, për të diskutuar planin ambicioz të investimeve në Kosovë.
Wolf Bavaria GmbH, kompani me seli në Heilsbronn, Gjermani, e njohur për zhvillimin e zgjidhjeve inovative në ndërtimin e thatë (Trockenbau), izolimin e zërit dhe ngrohjen e dyshemeve, ka prezantuar një investim prej mbi 10 milionë eurosh për hapjen e një fabrike prodhuese në Kosovë.
Z. Michael Wolf njoftoi se ky investim do të krijojë 200 vende pune deri në vitin 2027, duke zbatuar standardet më të larta gjermane për cilësinë dhe sigurinë në punë. Ky projekt synon uljen e kostove të lëndës së parë për 30%, përmes përdorimit të burimeve vendore natyrore dhe të qëndrueshme, si dhe rritjen e eksporteve nga Kosova në tregjet kryesore si Evropa, Amerika, Kanadaja, Japonia dhe Zelandë e Re.
Znj. Hajdari theksoi rëndësinë e investimeve të tilla për zhvillimin ekonomik të Kosovës: “Investimet e qëndrueshme janë çelësi i zhvillimit të qëndrueshëm ekonomik dhe krijimit të vendeve të punës në Kosovë. Jemi të përkushtuar të krijojmë një ambient sa më të favorshëm për investitorët vendorë dhe ndërkombëtarë.”
Gjatë takimit, znj. Hajdari i informoi përfaqësuesit e Wolf Bavaria GmbH mbi potencialin dhe përparësitë që Kosova ofron për investime, përfshirë përparimin e bërë në reformat për të bërë biznes transparent dhe konkurrues, si dhe nxitjen dhe mbrojtjen e investimeve të qëndrueshme dhe të përgjegjshme.
Pas takimit në ministri, z. Wolf dhe ekipi i tij, në shoqërim me zyrtarë të KIESA dhe MINT, vizituan parqet industriale të Kosovës, për të njohur nga afër infrastrukturën dhe kapacitetet që vendi ynë ofron për investitorët.
Ministria e Inovacionit, Ndërmarrësisë dhe Tregtisë falënderon diasporën kosovare në Gjermani për angazhimin e vazhdueshëm në krijimin e lidhjeve të biznesit dhe sjelljen e njohurive dhe investimeve në vendin tonë.
MINT mbetet gjithmonë në mbështetje të investitorëve vendorë dhe ndërkombëtarë, duke garantuar kushte të favorshme dhe duke punuar për një klimë biznesi të qëndrueshme dhe konkurruese.
