Një delegacion ndërkombëtar prej 25-anëtarësh, pjesë e Punëtorisë për Bashkëpunim Jug-Jug dhe Trepalësh për Avancimin e Parandalimit të Korrupsionit (#SSTC), vizitoi Agjencinë për Parandalimin e Korrupsionit (APK), për të mësuar më shumë mbi nismat kundër korrupsionit në Republikën e Kosovës dhe ndërtimin e platformës inovative të raportimit të korrupsionit.
Drejtori i APK-së, Yll Buleshkaj, prezantoi mandatin dhe funksionet kyçe të agjencisë në luftën për parandalimin e korrupsionit në Kosovë.
Ai theksoi se zhvillimi i platformës “Corruption-Free Portal”, fuqizon qytetarët që të angazhohen aktivisht në ruajtjen dhe avancimin e integritetit të institucioneve publike.
Z. Buleshkaj falënderoi partnerët ndërkombëtarë, përfshirë Republikën e Koresë, për mbështetjen e dhënë në zhvillimin dhe përmirësimin e kësaj platforme.
Ai gjithashtu nënvizoi rëndësinë e harmonizimit të standardeve rajonale dhe rritjes së bashkëpunimit për të arritur rezultate më të mira në luftën kundër korrupsionit.
Ndërsa udhëheqësi i Divizionit për E-Shërbime dhe Sisteme në APK, z. Besnik Dragusha, bëri prezantimin e detajuar të funksionimit praktik të platformës “Corruption-Free Portal”, duke treguar mënyrën se si zyrtarët publikë mund të kryejnë obligimin ligjor të deklarimit të pasurisë, ndërsa qytetarët mund të raportojnë korrupsionin në mënyrë të thjeshtë, transparente dhe të sigurt.
Kjo vizitë e delegacionit ndërkombëtar ku po marrin pjesë përfaqësues nga Republika e Koresë (Korea e Jugut), Mongolia dhe Uzbekistani, mandej edhe vendet e Ballkanit Perëndimor (Shqipëria, Bosnjë e Hercegovina, Mali i Zi, Maqedonia e Veriut dhe Serbia), shërben si një hap i rëndësishëm në forcimin e bashkëpunimit ndërkombëtar dhe shkëmbimit të përvojave për luftën kundër korrupsionit në rajon dhe më gjerë.
