Një ngjarje dramatike ka ndodhur në Zvicër, ku një pjesë e madhe e akullnajës Birch është shembur dhe ka mbuluar pjesërisht fshatin Blatten.
Fatmirësisht, banorët ishin evakuuar disa ditë më parë për shkak të rrezikut të shembjes së akullnajës, por një person është raportuar i zhdukur.
Shumë shtëpi janë shkatërruar plotësisht. Kryetari i fshatit, Matthias Bellwald, deklaroi se ndodhi e paimagjinueshmja, por theksoi se fshati ka ende një të ardhme.
Autoritetet lokale kanë kërkuar ndihmë nga njësitë e ushtrisë zvicerane për menaxhimin e katastrofës, dhe anëtarë të qeverisë janë duke udhëtuar drejt vendit të ngjarjes.
🔴 Effroyables images depuis la Suisse, tournées ce mercredi après-midi… Des millions de mètres cubes de glace et de roche viennent de détruire le village (évacué) de Blatten [CH], dans le Valais…🇨🇭(©PomonaMedia) pic.twitter.com/BCxH7ywv5T
— Météo Franc-Comtoise (@MeteoFrComtoise) May 28, 2025
Më 19 maj, 300 banorë u detyruan të largoheshin nga shtëpitë e tyre pasi gjeologët paralajmëruan për paqëndrueshmërinë e akullnajës. Disa prej tyre mund të mos kenë mundësi të kthehen më në fshat.
Qeveria zvicerane ka premtuar mbështetje financiare për të siguruar që banorët të mund të qëndrojnë në zonë, nëse jo në vetë fshatin. Megjithatë, ekziston mundësia e evakuimeve të mëtejshme në zonat përreth Blattenit.
Ngrohja globale po shkakton shkrirjen e shpejtë të akullnajave dhe permafrostit, i cili vepron si një “ngjitës” që mban së bashku malet e larta. Pamjet nga droni tregojnë se si u shemb një pjesë e madhe e akullnajës Birch.
Raportimet më të fundit sugjerojnë se akullnajat zvicerane mund të zhduken brenda një shekulli nëse temperaturat globale nuk mbahen brenda rritjes prej 1.5°C mbi nivelet para-industriale, siç është rënë dakord në Marrëveshjen e Parisit.
