Komandanti i Forcës së Sigurisë së Kosovës, Gjenerallejtënant Bashkim Jashari, priti një delegacion të lartë nga Instituti Kërkimor Shkencor Ushtarak i Akademisë së Forcave të Armatosura të Shqipërisë, në kuadër të bashkëpunimit me Komandën e Doktrinës dhe Stërvitjes së FSK-së.
Gjatë takimit, Gjenerallejtënant Jashari vlerësoi rolin kyç të këtij institucioni në zhvillimin e kërkimeve shkencore ushtarake, duke e cilësuar thelbësor për modernizimin e forcave të armatosura, njofton FSK.
Ai theksoi rëndësinë e bashkëpunimit në fushën e sigurisë dhe mbrojtjes, për të ndërtuar kapacitete të avancuara dhe të përbashkëta.
Në përmbyllje, të dyja palët u pajtuan të vazhdojnë dhe thellojnë bashkëpunimin në fushën e kërkimeve ushtarake dhe aktiviteteve të përbashkëta profesionale.
