Gjinekologu Afrim Veliu, pak ditë më parë u sulmua fizikisht, pranë ordinancës së tij.
Katër ditë pasi u sulmua fizikisht dhe pësoi plagë trupore, në hyrje të ordinancës së Veliut u gjet një granatë dore, pa mekanizëm ndezës, raporton IndeksOnline.
Lidhur me këtë rast, Policia e Kosovës nisi hetimet intensive, që rezultuan me kapjen e një të dyshuari, në Fushë-Kosovë.
Policia bastisi një lokacion ku banonte me qira i dyshuari në fjalë, e ku u gjeten dhe u sekuestruan prova relevante me rastin.
I dyshuari, pas intervistimit, u dërgua në mbajtje për 48 orë. Mbi të u iniciuan rastet me veprat penale: “Kanosje” dhe “Lëndim i lehtë trupor”.
“Hetimet janë duke vazhduar në koordinim të ngushtë me prokurorinë, me qëllim të identifikimit të personave tjerë të përfshirë dhe zbardhjes së plotë të rastit”, bën të ditur policia.
Ky është njoftimi i plotë:
Njësia e hetimeve të përgjithshme e rajonit të Prishtinës, dje ka realizuar me sukses arrestimin e një personi të dyshuar lidhur me dy raste të ndara që rrezikuan sigurinë publike në lagjen Ulpiana, Prishtinë.
Më 20.05.2025, një qytetar u sulmua fizikisht nga një person i panjohur përballë ordinancës së tij, duke pësuar lëndime të lehta trupore. Katër ditë më vonë, më 24.05.2025, në hyrje të së njëjtës ordinancë, u gjet një granatë dore F-1 pa mekanizëm ndezës, e cila u largua në mënyrë të sigurt nga Njësia për Trajtimin e Mjeteve Eksplodues (NJTME).
Pas hetimeve të thelluara, dje në Fushë Kosovë është identifikuar dhe arrestuar njëri nga të dyshuarit. Gjatë bastisjes në adresën ku qëndronte me qira, janë sekuestruar prova relevante.
Me vendim të Prokurorit, i dyshuari është ndaluar për 48 orë për veprat penale “Kanosja” dhe “Lëndim i lehtë trupor”.
Hetimet janë duke vazhduar në koordinim të ngushtë me Prokurorinë, me qëllim të identifikimit të personave tjerë të përfshirë dhe zbardhjes së plotë të rastit.
Policia e Kosovës falënderon qytetarët për bashkëpunimin dhe vigjilencën, dhe riafirmon përkushtimin e saj për garantimin e sigurisë publike, parandalimin e rreziqeve dhe zbulimin e çdo vepre penale që cenon rendin dhe qetësinë publike.
Siguria juaj, misioni ynë!
