Presidenti amerikan, Donald Trump, ka thënë se Shtetet e Bashkuara do ta shtyjnë zbatimin e një tarife prej 50 për qind ndaj mallrave nga Bashkimi Evropian deri më 9 korrik, për t’iu dhënë kohë negociatave me bllokun për një marrëveshje tregtare.
Pajtimi u arrit pas një bisede telefonike, të dielën, me kryetaren e Komisionit Evropian, Ursula von der Leyen, e cila i kishte thënë Trumpit se donte “negociata serioze”, sipas presidentit amerikan.
“I thashë kujtdo që do të dëgjonte, se këtë duhej ta bënin”, deklaroi Trump para gazetarëve në Morristaun të Nju-Xhersit, më 25 maj, teksa po përgatitej të kthehej në Uashington.
Von der Leyen, sipas Trumpit, u zotua se BE-ja do të angazhohej shpejt për të punuar drejt një zgjidhjeje, raporton Associated Press.
Në një postim në mediat sociale, të premten, Trump kishte kërcënuar BE-në me tarifë, duke u ankuar për qasjen e bllokut 27-anëtarësh dhe mungesën e përparimit në bisedime.
Tarifat, kishte paralajmëruar ai, do të hynin në fuqi më 1 qershor.
Por, biseda me von der Leyen duket t’i ketë zbutur tensionet, të paktën tani për tani.
“U pajtova me zgjatjen e afatit – deri më 9 korrik 2025. Ishte privilegji im”, shkroi Trump në platformën Truth Social.
Nga ana e saj, von Der Leyen tha se BE-ja dhe SHBA-ja “kanë marrëdhënien më të rëndësishme dhe më të ngushtë tregtare në botë”.
“Evropa është e gatshme për përparim të shpejtë dhe vendimtar në bisedime”, u shpreh ajo. “Për të arritur një marrëveshje të mirë, do të na duhet koha deri më 9 korrik”./RadioEvropaeLirë
