Ish-presidenti i Kosovës, Fatmir Sejdiu është deklaruar në lidhej me situatën e krijuar politike e institucionale në vend pasi për 21 herë radhazi deputetët nuk kanë arritur që të konstituojnë Kuvendin.
Pas kësaj, Sejdiu tha se bllokimi i zgjedhjes së kreut të Kuvendit të Kosovës paraqet një situatë të pazakonshme institucionale dhe politike.
Ai theksoi bllokimi i Kuvendit e paralizon jetën parlamentare dhe pengon formimin e qeverisë së re
“Kjo gjendje po reflekton mungesë të konsensusit politik dhe gatishmërisë për kompromis, duke dëmtuar drejtpërdrejt stabilitetin institucional dhe besimin e qytetarëve në procesin demokratik. Është nevojë urgjente që pozita dhe opozita të tregojnë maturi politike dhe fleksibilitet, duke u angazhuar në dialog serioz për të arritur një marrëveshje. Bashkëpunimi ndërpartiak është çelës për zhbllokimin e situatës dhe rikthimin e funksionimit normal të institucioneve”, deklaroi ai.
Sejdiu tha se nëse kriza vazhdon, rrezikohet jo vetëm puna e Kuvendit dhe formimi i qeverisë, por edhe stabiliteti politik në vend dhe se pasojat mund të përfshijnë: zgjedhje të reja e të parakohshme, krizë të besueshmërisë në institucione dhe dëmtim të imazhit ndërkombëtar të Kosovës.
“Shoqëria jonë ka nevojë për institucione funksionale dhe për angazhim të përbashkët politik që u përgjigjen pritjeve të qytetarëve për zhvillim, stabilitet dhe përparim demokratik. Vetëm përmes paqes publike, bashkëpunimit dhe mirëkuptimit mund të ndërtojmë një të ardhme të sigurt dhe të qëndrueshme për vendin tone”
