Shefi i asamblistëve të Lëvizjes Vetëvendosje në Suharekë, Liridon Fandaj, ka ngritur shqetësimin se Komuna e Suharekës nuk ka aplikuar fare për programin qeveritar të Banimit të Përballueshëm dhe Social, një mundësi që synon të ndihmojë çiftet e reja dhe familjet me të ardhura të ulëta.
Në një postim të bërë në Facebook, Fandaj e cilësoi këtë mosveprim si skandal, duke ngritur pyetje të drejtpërdrejta për motivet që qëndrojnë pas mospjesëmarrjes së komunës në këtë iniciativë të rëndësishme.
“Pse nuk aplikoi Theranda? A po i mban kryetari interesat e bizneseve të ndërtimit mbi nevojat e qytetarëve?”, shkroi ai.
Fandaj theksoi se banimi i përballueshëm nuk është luks, por një e drejtë bazike për qytetarët që ballafaqohen me vështirësi ekonomike.
Kjo nismë e Ministrisë së Mjedisit, Planifikimit Hapësinor dhe Infrastrukturës ka për qëllim të zbusë krizën e strehimit në komunat e Kosovës. Mungesa e aplikimit nga ana e Komunës së Suharekës është parë si një mundësi e humbur për të përfituar nga një projekt me rëndësi sociale dhe ekonomike.
