Fondi i Kursimeve Pensionale të Kosovës ka njoftuar kontribuuesit dhe palët e interesuara se të gjithë portofolat investues të FKPK-së tashmë janë rikthyer në nivel pozitiv edhe për vitin 2025.
Sipas një njoftimi për media bëhet e ditur se për datën e fundit të raportimit (15 maj 2025) investimet e FKPK-së për këtë vit e kanë këtë rezultat nga investimet: Portofoli Konservativ +1.26% — për moshën 63+ vjeç.
“Portofoli Balancuar +1.01% — për moshën 58-62 vjeç. Portofoli Standard +0.18% — për moshën 15 deri 57 vjeç”, thuhet në njoftim.
Po ashtu në njoftim bëhet e ditur se ky rikuperim erdhi pas rënieve të theksuara në tregjet financiare globale, të cilat gjatë marsit dhe prillit i kishin prekur kursimet e kontribuuesve të FKPK-së të moshës deri 63 vjeçare.
Ndërsa kontribuuesit e moshës 63 vjeçar e sipër sipas njoftimit kanë qenë vazhdimisht të mbrojtur nga luhatjet, duke realizuar kthim pozitiv nga investimet.
“Ritheksojmë se në afatgjatë FKPK-ja ka dëshmuar ngritje të vlerës nga investimet, dhe ka akumuluar rreth 1 miliard euro kthim bruto nga investimet (prej themelimit e deri më tani)”, thuhet në njoftim.
