Të paktën 140 palestinezë janë vrarë në Gaza në 24 orët e fundit, një përshkallëzim vdekjeprurës, ndërsa Izraeli dukej gati të niste një ofensivë të madhe në territorin e rrethuar.
Sulmet izraelite në Gaza kanë vrarë më shumë se 300 persona që nga e enjtja, thanë zyrtarët palestinezë të shëndetësisë, një nga periudhat më vdekjeprurëse në luftë që nga ndërprerja e bisedimeve për armëpushim në mars.
Fushatat e intensifikuara të bombardimeve erdhën ndërsa bllokada totale e Izraelit ndaj ndihmës humanitare ka shkaktuar frikë për një krizë buke në territorin palestinez.
“Që nga mesnata, kemi marrë 58 martirë, ndërsa një numër i madh viktimash mbeten nën rrënoja. Situata brenda spitalit është katastrofike”, tha Marwan al-Sultan, drejtori i spitalit indonezian në Gazën veriore herët të shtunën.
Numri i të vdekurve në 24 orët e fundit ishte të paktën 146, sipas Reuters.
Përshkallëzimi i sulmeve u dënua nga shefi i të drejtave të njeriut të OKB-së, Volker Türk, të premten, i cili tha se fushata e bombardimeve kishte për qëllim zhvendosjen e palestinezëve dhe se ishte ekuivalente me spastrim etnik.
“Ky breshëri i fundit bombash… dhe mohimi i ndihmës humanitare nënvizojnë se duket se ka një shtytje për një ndryshim të përhershëm demografik në Gaza, që është në kundërshtim me ligjin ndërkombëtar dhe është i barabartë me spastrim etnik”, tha ai.
Komentet e tij u mbështetën edhe nga sekretari i përgjithshëm i OKB-së, António Guterres, i cili bëri thirrje për një armëpushim të përhershëm ndërsa fliste në një samit të Ligës Arabe në Bagdad të shtunën.
Izraeli tha se bombardimet ishin fazat fillestare të një operacioni për një zgjerim të fushatës në Gaza që synonte “të arrinte të gjitha qëllimet e luftës në Gaza”.
Sulmet u shoqëruan me një grumbullim të madh trupash përgjatë kufijve të Gazës, që synonin vendosjen e “kontrollit operacional” të pjesëve të Gazës.
Fushata, si dhe bllokada e ndihmës në territor, kishin për qëllim ta detyronin Hamasin të lironte pengjet, thanë zyrtarët izraelitë.
Organizata mori rreth 250 pengje gjatë sulmit të saj të tetorit 2023 ndaj Izraelit, i cili rezultoi në vdekjen e rreth 1,200 personave. Pesëdhjetë e shtatë pengje mbahen ende nga Hamasi.
Ndërsa ofensiva e Izraelit në Gaza, e nisur në hakmarrje për sulmet e tetorit 2023, ka vrarë rreth 53,000 njerëz në Gaza, sipas autoriteteve shëndetësore palestineze.
