Shqipëria mikpriti dje Samitin e VI të Komunitetit Politik Evropian, duke shënuar kështu takimin për herë të parë në Ballkanin Perëndimor të një formati të tillë.
Nën logon “New Europe in a new world” samiti mblodhi në Tiranë kryetarë shtetesh dhe qeverish nga 47 vende europiane, së bashku me drejtuesit e institucioneve kryesore evropiane dhe ndërkombëtare.
Kryeministri Edi Rama ndau sot në rrjetet sociale disa nga momentet kryesore nga ky samit duke nisur nga pritja e liderëve europianë në tapetin e kuq dhe firmosja prej tyre e logos së këtij samiti të vendosur në hyrje të sallës ku mbajti punimet ky forum.
“Me krenarinë e një dite historike të Evropës në Shqipëri”, shprehet Rama, krahas pamjeve.
Në fjalën hapëse të samitit, Rama propozoi “një aleancë ndërkombëtare përtej armatimit”, ide kjo që u mbështet edhe nga presidenti francez Emmanuel Macron.
Samiti vijoi përgjatë ditës së djeshme me seancat plenare dhe tryezat e diskutimeve.
Po ashtu, kryeministri Rama zhvilloi gjatë ditës së djeshme takime dypalëshe me personalitetet pjesëmarrëse, në mjediset e dedikuara, duke nisur me sekretarin e përgjithshëm të NATO-s, Mark Rutte e më pas me kryeministrin e Spanjës Pedro Sanchez; presidenten e Komisionit Evropian, Ursula von der Leyen; princin sovran të Monakos, Albert II; me kancelarin e Austrisë, Christian Stocker.
