“Procesi i shitjes së biletave për ndeshjen Shqipëri–Serbi është i hapur për të gjithë tifozët, pa asnjë përjashtim”.
FSHF ka dalë me një deklaratë zyrtare gjatë ditës së sotme në lidhje me biletat e ndeshjes Shqipëri-Serbi që do të luhet më 7 qershor në “Arena Kombëtare”.
Gjithçka lidhet me një lajm që ka qarkulluar së fundmi, se nuk do të shiten bileta për shqiptarët e Kosovës.
“Federata e Futbollit dëshiron të përgënjeshtrojë kategorikisht një lajm të shpërndarë së fundmi nga një media online me bazë në Zvicër, që pretendon në mënyrë të rreme dhe pa asnjë bazë faktike se tifozët shqiptarë nga Kosova janë të përjashtuar nga ndeshja Shqipëri–Serbi, që luhet më 7 qershor në stadiumin “Arena Kombëtare”. Ky informacion është krejtësisht i pavërtetë dhe abuziv. FSHF i ka dërguar një komunikim zyrtar medias në fjalë dhe është në pritje të një përgjigjeje formale. Sqarojmë se procesi i shitjes së biletave për ndeshjen Shqipëri–Serbi do të kryhet përmes një sistemi transparent dhe të hapur për të gjithë tifozët, pa asnjë diskriminim apo përjashtim”, thuhet në njoftimin e FSHF-së.
Aplikimi për bileta sipas këtij njoftimi, do të nisë më 15 maj, përmes një formulari elektronik që do të publikohet në faqen zyrtare të FSHF-së.
“Afati i aplikimit do të zgjasë dy javë dhe në fund të muajit maj do të zhvillohet një short kompjuterik, për të përzgjedhur tifozët që do të kenë të drejtën të blejnë biletat. Të përzgjedhurit do të njoftohen me email. FSHF mbetet e përkushtuar ndaj një organizimi dinjitoz të ndeshjes dhe fton të gjithë tifozët shqiptarë, kudo që ndodhen, të ndjekin me besim komunikimet zyrtare dhe të mos bien pre e lajmeve të rreme”, theksohet në ndër të tjera në njoftimin e shtëpisë së futbollit shqiptar.
