Organizata e Veteranëve të Luftës së Ushtrisë Çlirimtare të Kosovës (OVL e UÇK-së), së bashku me aktivistët e Partisë Socialdemokrate (PSD), kanë protestuar sot përpara hotelit ku po qëndron kryetarja e Gjykatës Speciale, Ekaterina Trendafilova. Protesta, e cila nisi si shprehje e pakënaqësisë ndaj vizitës së saj në Kosovë, eskaloi kur protestuesit hodhën mjete piroteknike dhe tymuese në drejtim të objektit.
Në një konferencë për media të mbajtur më herët gjatë ditës, përfaqësuesit e OVL-së ritheksuan qëndrimin e tyre të palëkundur kundër Gjykatës Speciale dhe e cilësuan praninë e Trendafilovas si provokim dhe fyerje ndaj sakrificës së UÇK-së. Ata paralajmëruan se do ta kundërshtojnë çdo përpjekje për të, sipas tyre, kriminalizuar luftën çlirimtare.
Protesta u zhvillua nën masa të shtuara sigurie, me praninë e njësive të shumta të Policisë së Kosovës. Njësia Speciale kishte blinduar hyrjen e hotelit ku ishte paraparë që Trendafilova të zhvillonte takime, ndërsa protestuesit brohorisnin vazhdimisht “UÇK, UÇK”, në një atmosferë të tensionuar.
