Deputeti i Lëvizjes Vetëvendosje, Agim Bahtiri, ka mbështetur letrën e kryeministrit Albin Kurti drejtuar Lidhjes Demokratike të Kosovës (LDK), duke e cilësuar atë si një “marrëveshje e mençurisë” në shërbim të stabilitetit politik dhe interesit qytetar.
Përmes një postimi në Facebook, Bahtiri theksoi se në rrethanat aktuale, është jetike që interesat e qytetarëve të vendosen mbi ato partiake.
Ai shtoi se Kosova nuk ka luksin të bllokohet në një cikël të pafund zgjedhjesh, ndërsa përpara e presin sfida të rëndësishme si negociatat me Serbinë dhe ndërtimi i institucioneve funksionale.
“Një marrëveshje e mundshme LVV–LDK nuk është kompromis i dobësisë, por një marrëveshje e mençurisë — një akt përgjegjësie për të ndërtuar institucione të forta dhe për t’i dhënë fund ngërçit politik,” shkroi Bahtiri.
Ai theksoi se pa unitet politik nuk mund të ketë pavarësi të vërtetë apo zhvillim të qëndrueshëm dhe se lidershipi duhet të veprojë me guxim, duke mos lejuar që e kaluara të mbajë peng të ardhmen e vendit.
“Kosova nuk është pronë e askujt, por amanet i gjeneratave që sakrifikuan dhe i atyre që do të vijnë”, përfundoi ai.
